Danas nam je divan dan… za preporuke

Rođendan za vrijeme izolacije. Nema velike proslave, nema gostiju, nema izlaska, ali ima torte, ima lijepe muzike, lijepih knjiga, filmova i serija, korisnih linkova i ideja. U suštini, nije tako ni loše, kad malo bolje razmislim. U nastavku slijedi nekoliko nasumično (pa dobro, možda i nije baš tako nasumično) odabranih preporuka i prijedloga čemu posvetiti malo svoje pažnje i svoga vremena. I da, prigodni su za ove okolnosti u kojima smo se našli, što će reći, ne podrazumijevaju izlazak iz kuće.

Ako želite da posvetite više vremena nekom stranom jeziku:

Ok, svi znamo da možemo skinuti neku aplikaciju (hvala nebesima što postoji Duolingo) ili se prijaviti na neki od sajtova ili besplatnih kurseva za učenje stranog jezika, ali nekad bismo voljeli i nešto zanimljivije, nešto malo drugačije. Evo nekih prijedloga koje i sama planiram da isprobam ovih dana:

• Pokušajte čitati novine/portale/blogove na jeziku koji želite da usavršite. Ne mora to biti tri sata čitanja, dovoljno je, makar za početak, uz kafu pročitati neki kraći članak, kratku vijest, post na nekom blogu. Stvoriti sebi mali ritual, to može biti jednom sedmično, svakog drugog dana, samo vikendom, ili svaki dan, prema sopstvenim željama i mogućnostima. U svakom slučaju, čitate nešto što vas zanima + vježbate jezik + vidite koliko razumijete jezik u takvoj njegovoj upotrebi.
• Napravite sebi tematsko veče posvećeno tom jeziku i kulturi. Nađite neki film na tom jeziku, napravite neku hranu specifičnu za tu zemlju, taman možete jesti dok gledate film, a dok pravite hranu, slušajte muziku na tom jeziku. Eto, jedno veče popunjeno.

Ako želite da čitate:

Odabrala sam i nekoliko zanimljivih besplatnih opcija koje se tiču čitanja knjiga/časopisa/naučne literature, pa možda nekom bude korisno:

• Ovu priču sam već nekad ranije dijelila, ali toliko mi je draga da sam morala opet. Duck, Death and the Tulip, prelistaj ovdje.
• Otvoren pristup JSTOR baze: ovdje. Ovome se posebno radujem!
• Zatim jedan magazin koji nam je i inače besplatno dostupan i izlazi svakog 13. u mjesecu, Plezir. Martovsko izdanje pogledajte ovdje.
• I ono najjednostavnije moguće, a baš to često znamo da zaboravimo, uzmite odmah neku od knjiga koje ste kupili ko zna kada i ostavili da čeka neki idealan momenat da krenete s čitanjem. Kod mene je to trenutno Crni labud Nasima Nikolasa Taleba, knjiga koju sam kupila prije skoro godinu dana i nikako da dođe na red, sve do sada.

Ako želite da pravite/jedete nešto lijepo:

• Evo, taman da podijelim s vama i recept za tortu koju vidite na slici (ovogodišnju rođendansku). Jedna od ljepših koje sam probala u posljednje vrijeme. Orasi (nisam imala bademe, ali sjajno je ispalo i s njima), čokolada, maskarpone, bejlis… I da, nema brašna. Recept sam pronašla ovdje.
• I evo jedan recept za nešto slano: leća + mrkva + paradajz i imate sjajan gulaš, pogledajte ovdje. Često znam da pravim nešto od ovoga što se može naći na sajtu Madeleine Shaw, jer je uglavnom riječ o brzim, jednostavnim i stvarno ukusnim jelima.
• A ako volite da gledate YT snimke i želite nešto tamo da pogledate u vezi sa hranom, onda je definitivna preporuka kanal Pick Up Limes. Naravno da se desi situacija sa sastojcima do kojih je teško doći (znate one “prah roga jednoroga” momente), ali ima i dosta jednostavnih i lako dostupnih opcija).

Ako želite da obilazite:

Obilazite muzeje, virtuelno. Evo nekoliko zanimljivih opcija:

• Ivan Meštrović, Narodni muzej u Beogradu: ovdje;
• Naravno, morala sam da spomenem i  Google Arts and Culture, gdje možete pronaći mnoštvo muzeja iz cijelog svijeta, evo linka koji vodi do njihovog spiska: ovdje.

Ako želite da naučite nešto:

• Udemy mi je definitivno omiljeno mjesto za razne kurseve o najrazličitijim stvarima. Pored mnoštva sjajnih kurseva koji se plaćaju, ima i onih potpuno besplatnih. Ako vas zanima šta sve besplatno možete naći tamo, evo linka: ovdje.

Ako ne želite da radite nešto što traži neki poseban napor:

• Onda vam evo i preporuka jedne mnogo simpatične serije koju volim da gledam kad mi treba malo odmora od svega. Serija se zove Younger i ima već 6 sezona po nekih 12 epizoda, ako se ne varam, gdje svaka traje oko pola sata. Pratimo život Lajze Miler, žene u četrdesetim godinama koja pokušava da se vrati u svijet izdavaštva, a jedini način na koji to uspijeva jeste da se pretvara da je u dvadesetim. Sam taj osnovni zaplet i nije nešto posebno zanimljiv, meni je zanimljivije to smještanje radnje u kontekst jedne velike izdavačke kuće, a i hrpa nekih sporednih situacija u seriji i raznih replika stvarno zna biti urnebesna. Pogledaj najavu ovdje.

Toliko za ovo rođendansko javljanje. Sad odoh da još malo uživam u torti, a vi slobodno pišite u komentarima nešto od preporuka što bi nam svima moglo biti zanimljivo. Do narednog čitanja!